About these ads

Jotjot do tabege hata panolsolion di bagasan ngolu-ngolu siapari, panolsolion on ndang mamilliti harorona manang tu ise pe. Ndang ingkon tu dakdanak, ndang ingkon tu naposo, ndang ingkon tu natua-tua, ndang ingkon tu baoa, ndang ingkon tu boru-boru, alai saluhut do jolma hea di songgopi angka panolsolion.

Panolsolion ima panghilalaan na marungkil alani angka ulaon naung salpu na so boi be haulahan muse. Molo mangulahon sada-sada ulaon hita, manghirim ma roha boi dapot na denggan, hape na so tahirim i do na ro tu hita. Dison ma hita gabe manolsoli.

Alani na so dapot nasininta ni roha mambahen sada-sada halak gabe manolsoli,manang ala adong dongan na mambahen hassit ni roha, manang ala naung binahen na denggan tu dongan hape dapotan balos na gabe hassit ni roha.

Alani panolsolion i tung mansai marragam do berengon panghorhonna, adong do jolma na manolsoli gabe mambahen hasesega di ngoluna, ima alani na hurang bisuk ni roha. Holan naung di ulahon na i do sai di pingkiri alai na so di ulahonna dope ndang dipingkirhon. Dison ma gabe ro hasesega ni pingkiran, olo ma lam martamba-tamba angka parungkilon muse.

Di angka jolma na bisuk marroha, panolsolion i jumotjot do alani na so mangulahon sada-sada ulaon dope gabe manolsoli daripada alani naung mangulahon sada-sada ulaon na hurang tingkos. Dison nasida ndang manolsoli alani naung mangulahon na so tingkos i alai gabe sada sungkun-sungkun do di nasida boasa ndang “songon on” hu ulahon? Boasa ndang huulahon na songon on? Tarida ma dison bisuk ni rohana laho mamilang-milangi angka naung di ulahonna dohot na so diulahonna dope, asa unang ro be angka parungkilon jala unang manolsoli be di joloan ni ari.

Parngoluon na so hea adong panolsolion ima parngoluon na so boi dapot roha, ndang adong jolma na so hea manolsoli saluhut do hita jolma on hea manolsoli. Tung manang beha pe molo adong panolsolion disi ma hita boi marsiajar mananda dirinta sandiri asa gabe di sihaadongonta i hita mandalani parngoluon on. Unang gabe mardalan hita di dalan na hurang tingkos. Jala panolsolion i boi bahenon gabe sada pamilang-milangon laho patingkoshon angka hahurangan naung salpu. Molo dihajolmaonta on saluhut do hita ingkon mamillit na denggan manang na roa do naeng sidapotonta? Panolsolion i ndang na gabe sada toru-toru i ro tu parngoluonta on. Alai alani panolsolion boi ma tarida habisuhon ni roha laho mangadopi saluhut angka pargulmiton ni ngolunta tu ari na naeng ro.

Samisara Sipaha Onomo 2009

Oleh Bungaran Simanjuntak

About these ads